Ish-drejtori i përkohshëm i Administratës së Policisë së Malit të Zi, Nikola Terziq, nuk është lejuar të hyjë në territorin e Serbisë. Vendimi i autoritetyve serbe, i zbatuar me kërkesë të Agjencisë Serbe të Inteligjencës dhe Sigurisë (BIA), i është komunikuar Terziq-it pas një pritjeje katër-orëshe në pikën kufitare të Shpilanit.
Terziq, i cili shërbeu në kohën e qeverisë së Dritan Abazoviq, deklaroi se ky ndalim dëmton procesin mësimor, pasi ai duhej të mbante provimet përfundimtare për studentët e tij në një universitet serb. "Jam i befasuar dhe vërtet i zhgënjyer nga ky vendim i autoriteteve shtetërore të Republikës së Serbisë", theksoi ai.
Ngjarja ka ndodhur në një kontekst tensionesh mes dy shteteve, vetëm pak orë pasi autoritetet malazeze kthyen mbrapsht në Beograd një grup prej 87 personash. Grupi kishte mbërritur në Tivat me një fluturim çarter të kompanisë Air Serbia, të organizuar nga agjencia "Happy Travel" nga Bijelina.
Sipas shërbimeve të sigurisë në Mal të Zi, pjesëtarët e këtij grupi përbënin kërcënim për sigurinë kombëtare. Autoritetet njoftuan se disa prej tyre ishin të regjistruar për vepra penale dhe kundërvajtje me elementë dhune, ndërsa kishin marrë pjesë në tubime të rrezikshme. Përfaqësues të opozitës serbe, aktivistë dhe media kanë raportuar se një pjesë e personave të dëbuar nga Mali i Zi dyshohet se janë të lidhur me Partinë Progresive Serbe (SNS) të presidentit Aleksandar Vuçiq dhe janë përfshirë në incidente gjatë protestave politike në Serbi.