Autoritetet malazeze kanë ndërmarrë kontrolle të rrepta në aeroportin e Tivatit pasi një fluturim çarter me 90 shtetas serbë mbërriti nga Beogradi në mëngjesin e së mërkurës. Policia e Malit të Zi njoftoi se po kryhen verifikime të hollësishme lidhur me arsyet e ardhjes dhe qëndrimit të këtyre personave, në prag të samitit ndërkombëtar BE-Ballkani Perëndimor që do të zhvillohet më 5 qershor.
Sipas njoftimit zyrtar, autoritetet po vlerësojnë mundësinë e marrjes së masave kufizuese në përputhje me ligjin. Gazeta Vijesti raportoi se një pjesë e pasagjerëve konsiderohen si persona me interes sigurie dhe kanë të dhëna penale, ndërsa media të tjera kanë ngritur dyshime nëse grupi ishte caktuar për sigurimin jozyrtar të presidentit serb, Aleksandar Vuçiç.
Deputeti i partisë në pushtet, Lëvizja Evropa Sot, Tonqi Janoviç, përshëndeti veprimin e institucioneve. Përmes rrjetit social X, ai theksoi se ardhja e një grupi me "dosje të gjera" në një kohë kur janë në fuqi masat më të larta të sigurisë për një tubim ndërkombëtar, tregon për përballjen me kërcënime hibride. Institucionet serbe, përfshirë Policinë e Serbisë dhe Presidencën, nuk kanë dhënë komente zyrtare lidhur me këtë ngjarje.
Përditësime
Për sigurinë e samitit, Policia e Malit të Zi angazhoi mbi 1500 efektivë. Institucioni nuk u është përgjigjur kërkesave të Radios Evropa e Lirë (REL) për detaje mbi dosjet penale të 90 pasagjerëve të mbërritur nga Beogradi, ndërsa Policia e Serbisë ka shmangur sqarimet lidhur me dyshimet për sigurimin jozyrtar të presidentit Aleksandër Vuçiç.