Specialistët e Seksionit për Hetimin e Krimeve të Komisariatit të Policisë Vau i Dejës arrestuan shtetasin Gjergj Goli, 46 vjeç, banues në fshatin Barbullush. Ai ishte shpallur në kërkim në kuadër të operacionit të koduar “Neonët 5”, si bashkëpunëtor për përshtatjen e dy banesash për kultivimin e bimëve narkotike kanabis me llamba.
Disa javë më parë, nga këto dy ambiente u sekuestruan 583 bimë narkotike kanabis, rreth 7.5 kg kanabis i përpunuar dhe 307 pajisje elektrike për kultivim.
Gjykata e Shkallës së Parë e Juridiksionit të Përgjithshëm Shkodër i caktoi masën e sigurisë arrest në burg për veprat penale kultivimi i bimëve narkotike, prodhimi dhe shitja e narkotikëve, si dhe vjedhja e energjisë elektrike ose impulseve telefonike, të kryera në bashkëpunim.
Policia njofton se vijon puna për kapjen e shtetasve të tjerë të shpallur në kërkim. Materialet iu referuan Prokurorisë së Shkodrës për veprime të mëtejshme.