Pas një operacioni të gjerë kërkimor, Policia e Kosovës ka arrestuar të dyshuarin për vrasjen e ndodhur në fshatin Zlipotok të komunës së Dragashit. Viktima, i identifikuar si G.T., rreth 47-vjeç, humbi jetën si pasojë e plagëve të marra nga një mjet i mprehtë gjatë një përleshjeje mes disa personash.
Sipas zëdhënësit të Policisë së Kosovës për rajonin e Prizrenit, Shaqir Bytyqi, rasti u raportua rreth orës 23:15 të së hënës. Me të mbërritur në vendngjarje, patrullat policore gjetën viktimën të shtrirë në tokë. Megjithë dërgimin e tij në Qendrën Kryesore të Mjekësisë Familjare (QKMF) në Dragash, mjeku kujdestar konstatoi vdekjen.
I dyshuari B.H., 40-vjeç, u kap pas veprimeve intensive operativo-hetimore. Në aksionin për arrestimin e tij, policia angazhoi njësi të specializuara, duke përdorur teknologji vëzhgimi si dronët dhe njësinë e qenve policorë (K-9). I ndaluari është dërguar në stacionin policor, ku në koordinim me prokurorin e shtetit kanë nisur procedurat e mëtejme. Rasti është cilësuar zyrtarisht si "Vrasje e rëndë".
Përditësime
Policia ka identifikuar Beshir Hamzën si të dyshuarin për vrasjen e ndodhur në Dragash. Viktima është konfirmuar si Gazmend Tahirovci, imam i fshatit Zlipotok. Autoritetet bënë të ditur se i dyshuari dhe viktima ishin bashkëfshatarë.