Forcat e Policisë së Shkodrës kanë ekzekutuar urdhrin e ndalimit ndaj shtetasit Klivis Kuçaj, i cili ishte shpallur në kërkim për veprën penale të "tentativës për vrasje" lidhur me një ngjarje të mëparshme. Ndalimi i tij u bë pas përfshirjes në një përplasje në një lokal në plazhin e Velipojës më 8 qershor, ku pati edhe të shtëna me armë zjarri në ajër.
Sipas hetimeve, konflikti e ka zanafillën në një debat mes një grupi të rinjsh më 7 qershor. Një ditë më pas, Klivis Kuçaj së bashku me disa persona të tjerë janë paraqitur pranë lokalit ku ndodhej familja Ramazani, çka ka sjellë përshkallëzimin e situatës në dhunë fizike. Gjatë kësaj përplasjeje, Klivis Kuçaj ka marrë plagë të konsiderueshme në fytyrë.
Autoritetet policore kanë identifikuar si palë të përfshirë në konflikt edhe shtetasin Agim Ramazani, ndaj të cilit kanë nisur procedurat përkatëse ligjore. Policia vijon hetimet për zbardhjen e rrethanave të ngjarjes, si dhe për identifikimin e personit që ka qëlluar me armë zjarri gjatë incidentit në Velipojë.