Kristi Joga, 47 vjeç, banues në Korçë, u arrestua nga Seksioni për Hetimin e Krimeve Ekonomike dhe Financiare i Drejtorisë Vendore të Policisë Korçë, në kuadër të operacionit policor "Blackmail". Arrestimi ndodhi më 26 shkurt 2026, si rezultat i hetimeve 4-mujore me metoda proaktive dhe speciale, në drejtim të Prokurorisë pranë Gjykatës së Shkallës së Parë të Juridiksionit të Përgjithshëm Korçë.
Nga hetimet dyshohet se Joga ka shantazhuar një shtetas grek për rreth 3 vjet, duke kërcënuar me publikim bisedash dhe fotosh intime, dhe ka përfituar 4000 euro. Me të njëjtin mekanizëm dyshohet se ka përfituar shuma të konsiderueshme nga shtetas grekë të tjerë, që variojnë nga 30 000 deri në 40 000 euro.
Sipas detajeve të raportuara, Joga kishte hapur një profil fallco në rrjete sociale për rreth 2 vjet, duke pretenduar se ishte femër dhe duke dërguar foto burrave të martuar grekë. Pas bisedave konfidenciale, fotografonte ekranet dhe i shantazhonte për para. Hetimet u nisën pas denoncimit të një shtetasi grek 4 muaj më parë, ku policia e lokalizoi përmes adresës IP.
Joga akuzohet për veprat penale “Shtrëngimi me anë të kanosjes ose dhunës për dhënien e pasurisë” dhe “Mashtrimi”. Vijojnë hetimet për identifikimin dhe vënien para përgjegjësisë ligjore të shtetasve të tjerë të përfshirë.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme.