Shtetasi shqiptar Gëzim Çela, 37 vjeç, është arrestuar në Mbretërinë e Bashkuar si pasojë e bashkëpunimit mes Interpol Tiranës dhe autoriteteve britanike. Arrestimi i tij është kryer për qëllime ekstradimi drejt Shqipërisë, ku ai kërkohej për vepra penale në fushën e narkotikëve.
Sipas dokumenteve të gjykatës City of Westminster Magistrates’ Court, Çela akuzohet se më 15 tetor 2015 ka qenë pjesë e një grupi kriminal që ka trafikuar 49 kilogramë kanabis drejt Kosovës. Në këtë veprimtari kriminale, sipas autoriteteve, dyshohet se janë përfshirë edhe shtetasit Fran Merdhoci, Alfred Mikeli, Arif Çela dhe Victor Lekgegaj.
Gëzim Çela do të dalë para gjykatës britanike më 4 qershor 2026, në orën 10:00, për shqyrtimin e kërkesës për ekstradim. Deri në përfundim të këtyre procedurave, gjykata ka vendosur që ai të mbetet në paraburgim, duke refuzuar lirinë me kusht për shkak të rëndësisë së veprës penale.
Ministria e Drejtësisë në Tiranë ka një afat prej 40 ditësh për të dorëzuar dokumentacionin përkatës të dosjes. Për shkak se i arrestuari është dënuar në mungesë, kërkohet gjithashtu një garanci ligjore e firmosur nga ministri i Drejtësisë, Toni Gogu, e cila konfirmon të drejtën e tij për rigjykim pas ekstradimit.