Shërbimet e Policisë Rrugore Durrës arrestuan në flagrancë shtetasin L. K., 38 vjeç, banues në Tiranë, pasi e konstatuan duke drejtuar automjetin në gjendje të dehur në aksin rrugor Golem-Plepa.
Gjatë patrullimit për parandalimin e aksidenteve dhe ndëshkimin e shkelësve të rregullave të qarkullimit rrugor, policia i bëri shenjë ndalimi automjetit të drejtuesit L. K.. Testi i alkoolit konfirmoi se ai ishte në gjendje të dehur.
Gjatë veprimeve procedurale, drejtuesi iu ofroi punonjësve të policisë 5 000 lekë, me qëllim shmangien e procedurave ligjore.
L. K. u arrestua për veprat penale "korrupsioni aktiv i personave që ushtrojnë funksione publike" dhe "drejtimi i automjeteve në mënyrë të parregullt".
Materialet procedurale iu referuan Prokurorisë së Durrësit.
Ky rast është pjesë e 11 drejtuesve të automjeteve të arrestuar ose proceduar penalisht këto ditë, të cilët akuzohen se kanë tentuar të korruptojnë efektivët e Policisë Rrugore Durrës për të shmangur gjobat apo përgjegjësinë penale dhe administrative.