Policia Rrugore e Durrësit nisi procedimin penal në gjendje të lirë ndaj dy drejtuesve të automjeteve, pasi testet treguan se po drejtonin nën efektin e alkoolit. Sipas policisë, ata tentuan t’u ofronin para efektivëve për të shmangur masën administrative. Ngjarjet u raportuan më 9 nëntor në rrugët “Shkozet-Durrës” dhe “Princ Topia”.
Automjeti i drejtuar nga J. D., 41 vjeç, banues në Fier, u ndalua në rrugën “Shkozet-Durrës”, ndërsa ai i G. M., 48 vjeç, banues në Rrogozhinë, në rrugën “Princ Topia”. Sipas njoftimit të policisë, testi i alkoolit tregoi se të dy po drejtonin nën efektin e alkoolit.
Policia tha se drejtuesit tentuan t’u jepnin para punonjësve të saj për të shmangur masën administrative. Për të dy nisi procedimi penal në gjendje të lirë për veprën “Korrupsioni aktiv i personave që ushtrojnë funksione publike”. Materialet procedurale iu referuan Prokurorisë për veprime të mëtejshme.
Në njoftim, Policia Rrugore e Durrësit u bëri thirrje përdoruesve të rrugës të zbatojnë rregullat e qarkullimit dhe ftoi qytetarët të denoncojnë shkeljet në numrin 112. Sipas policisë, denoncuesve u garantohet anonimat dhe reagim i menjëhershëm.