Rexhep Muka alias Kreshnik Muka, 43 vjeç, banues në Shënavlash të Durrësit, u arrestua sot në qytetin e Durrësit nga shërbimet e policisë. Ai ishte shpallur në kërkim ndërkombëtar nga Interpol Roma për shkak të dënimit të marrë në Itali.
Shërbimet e Drejtoria e Forcës së Posaçme Operacionale në Departamentin e Policisë Kriminale organizuan dhe finalizuan operacionin e koduar “Operacionalja 82”, në bashkëpunim me Drejtorinë Vendore të Policisë Durrës. Në kuadër të këtij operacioni u lokalizua, identifikua dhe ndalua personi i shpallur në kërkim.
Sipas njoftimit të policisë, Gjykata e Apelit në Cagliari e Italisë, në vitin 2021, e dënoi Rexhep Mukën me 12 vite burg për veprën penale të trafikimit të lëndëve narkotike. Nga ky dënim i ka mbetur për të vuajtur 9 vite e 6 muaj.
Interpol Tirana, në bashkëpunim me Interpol Romën, po vijon procedurat për realizimin e ekstradimit të këtij shtetasi drejt Italisë, ku do të vuajë pjesën e mbetur të dënimit.