Në qytetin e Durrësit është finalizuar operacioni policor i koduar "Wanted 36", si rezultat i të cilit është vënë në pranga një 40-vjeçar, i shpallur në kërkim ndërkombëtar nga autoritetet italiane. Arrestimi është kryer nga Seksioni për Mbështetjen Operacionale të Hetimit në bashkëpunim me Seksionin për Hetimin e Narkotikëve dhe Trafiqeve të DVP Durrës, pas informacioneve të siguruara në rrugë operative.
Shtetasi, i identifikuar me inicialet O. D., alias O. K., u lokalizua dhe u kap në lagjen nr. 12 të qytetit bregdetar. Ndaj tij, Gjykata e Apelit e Venecias në Itali ka dhënë një dënim prej 11 vitesh e 1 muaji burgim, për veprat penale "Trafikimi i lëndëve narkotike" dhe "Falsifikimi dhe mbajtja e dokumenteve të rreme".
Sipas njoftimit zyrtar, nga masa e dënimit të dhënë nga drejtësia italiane, të arrestuarit i kanë mbetur për të vuajtur edhe 4 vjet e 15 ditë burgim. Aktualisht, Interpol Tirana, në bashkëpunim me homologët italianë, po vijon procedurat e nevojshme për ekstradimin e këtij shtetasi drejt Italisë, ku do të bëhet edhe vënia në ekzekutim e pjesës së mbetur të dënimit.