Sektori për Kërkimin (FAST Albania), në bashkëpunim me Drejtorinë Vendore të Policisë Fier, kanë lokalizuar dhe arrestuar 48-vjeçarin Bledar Buxheli, i njohur edhe me mbiemrin Bledar Çelo. Operacioni i koduar "Fast" u finalizua në qytetin e Lushnjës, me qëllim ekstradimin e tij drejt Italisë.
Sipas njoftimit zyrtar, shtetasi ishte shpallur në kërkim ndërkombëtar nga Interpol Roma. Ai rezulton i dënuar nga Gjykata e Apelit e Venecias në vitin 2024 me 11 vjet burgim për veprën penale të trafikimit të lëndëve narkotike, sipas parashikimeve të Kodit Penal italian.
Nga dënimi i dhënë, 48-vjeçarit i kanë mbetur për të vuajtur edhe 8 vjet, 6 muaj e 24 ditë burgim. Aktualisht, Interpol Tirana, në bashkëpunim me Interpol Romën, po ndjek procedurat ligjore për ekstradimin e tij. Ky operacion është pjesë e aksioneve të vazhdueshme për kapjen e personave të shpallur në kërkim ndërkombëtar, në kuadër të bashkëpunimit me agjencitë ndërkombëtare të zbatimit të ligjit.