Sektori për Kërkimin pranë Drejtorisë së Forcës së Posaçme Operacionale (FAST Albania) ka finalizuar një tjetër fazë të operacionit policor të koduar "Fast", duke mundësuar lokalizimin dhe arrestimin e 26-vjeçarit Spartak Berisha. Operacioni u zhvillua në bashkëpunim të ngushtë me strukturat operacionale të DVP Durrës dhe Komisariatin e Policisë Kavajë.
Shtetasi i arrestuar ishte shpallur në kërkim ndërkombëtar nga Interpol Roma, pasi Gjykata e Breshias në Itali kishte vendosur ndaj tij masën e sigurisë "Arrest në burg". Ai akuzohet për veprën penale "Pjesëmarrje në organizatë kriminale me qëllim trafikimin e lëndëve narkotike".
Hetimet e autoriteteve italiane kanë zbuluar se 26-vjeçari ka qenë pjesë e një organizate kriminale të përbërë nga shtetas shqiptarë dhe italianë, e cila operonte në trafikimin dhe shpërndarjen e lëndëve narkotike në disa zona të Italisë. Legjislacioni italian parashikon një dënim maksimal deri në 24 vjet burgim për këto vepra penale.
Aktualisht, Interpol Tirana në bashkëpunim me Interpol Romën po vijon procedurat ligjore për ekstradimin e të riut drejt Italisë, ku ai do të përballet me akuzat e ngritura nga drejtësia italiane.