Në kuadër të operacionit policor të koduar “Fast”, shërbimet e Sektorit për Kërkimin (FAST Albania), në bashkëpunim me Drejtorinë Vendore të Policisë Shkodër, kanë lokalizuar dhe vënë në pranga 32-vjeçarin Franko Broqi. Operacioni për kapjen e këtij shtetasi u zhvillua në fshatin Kosan, Malësi e Madhe, ku i dyshuari banonte.
Shtetasi ishte shpallur në kërkim ndërkombëtar nga autoritetet italiane, pasi Gjykatësi për Hetimet Paraprake në Gjykatën e L’Aquila-s kishte lëshuar një urdhër-arrest ndaj tij. Sipas Kodit Penal Italian, 32-vjeçari akuzohet për dy vepra penale: “Pjesëmarrje në organizatë kriminale me qëllim trafikimin e lëndëve narkotike” dhe “Prishje e vulave të vendosura nga autoritetet”.
Pas arrestimit provizor në Shqipëri, Interpol Tirana dhe Interpol Roma po vijojnë procedurat e nevojshme ligjore për ekstradimin e Franko Broqit drejt Italisë, ku ai do të përballet me drejtësinë për akuzat e ngritura.