Autoritetet kolumbiane arrestuan Florind Ramën, të njohur edhe si Florin Terziu, në qytetin Pereira të Kolumbisë. Ai ishte shpallur në kërkim ndërkombëtar nga Interpol me një kod të kuq për përfshirje të dyshuar në rrëmbim, torturë dhe vrasje të ndodhur në Marbella të Spanjës më vitin 2022.
Mediat kolumbiane kanë publikuar pamjet e arrestimit. Në video shihet momenti kur agjentët i vendosin prangat, i lexojnë akuzat dhe të drejtat procedurale. Rama deklaron se nuk ka nevojë për avokat dhe kërkon të bëjë një telefonatë për të kontaktuar një familjar: "Nuk kam avokat, nuk kam nevojë për një avokat… mund të bëjë një telefonatë".
Gjatë ndalimit, ai tentoi të identifikohet si shtetas gjerman, por autoritetet kishin informacion për origjinën shqiptare dhe kaluarën e tij kriminale në Evropë. Dyshohet se përdorte të paktën dy pasaporta për të lëvizur në vende si Mbretëria e Bashkuar, Mali i Zi, Serbia, Kroacia, Gjermania dhe Spanja.
Rama lidhet me struktura kriminale në zonën Costa del Sol të Spanjës, të njohur për aktivitetin e trafikut të drogës dhe rrjeteve ndërkombëtare kriminale. Ngjarja specifike ndodhi më 30 qershor 2022 në zonën Golden Beach të Marbellës, ku u gjet i vrarë shtetasi serb Aleksandar K. me shenja torture dhe plagë nga armë zjarri. Viktima dyshohet se kishte lidhje me rrjete droge dhe bashkëpunonte si informator me autoritetet gjermane.
Autoritetet spanjolle lëshuan urdhër-arrest në korrik 2022 dhe në nëntor 2023. Hetimet vijojnë për lidhjet e tij me grupe kriminale në disa vende evropiane.