Florind Rama, shtetas shqiptar, u arrestua në Pereira të Kolumbisë në kuadër të një operacioni të koordinuar midis policisë lokale, Europol-it dhe autoriteteve spanjolle.
Ai ishte në kërkim nga INTERPOL me kod të kuq për një vrasje të kryer në Marbella të Spanjes në vitin 2022. Burimet raportojnë se Rama dyshohet për përfshirje në rrëmbim, torturë dhe vrasje të viktimës, e cila u mbajt kundër vullnetit, u torturua dhe u eliminua.
Drejtori i Policisë së Pereira-s, William Rincón, deklaroi se hetimet e vendosin Rama-në si pjesë të një rrjeti me origjinë shqiptare, me rol në komponentin e armatosur dhe lidhje me raste torture dhe vrasjesh me pagesë.
Paralelisht, autoritetet kolumbiane po verifikojnë lidhjet e mundshme të Rama-së me rrjete të trafikut të drogës në rajon, duke analizuar lëvizjet, kontaktet dhe aktivitetet e tij në Pereira dhe zona të tjera.
Përditësime
Florin Terziu rezulton pseudonimi i Florind Ramës, i arrestuar në apartamentin e lagjes Pinares pas ndjekjeje 30-ditore në Cerritos dhe Álamos.
Rama tentoi të identifikohet si shtetas gjerman me dy pasaporta. Ai lëvizte në Mbretërinë e Bashkuar, Mal të Zi, Serbi, Kroaci, Gjermani dhe Spanjë.
Ai dyshohet për vrasjen e Aleksandar K., serb dhe informator gjerman me lidhje droge, më 30 qershor 2022 në lagjen Golden Beach, Marbella.
Urdhrat e arrestit datonë nga korriku 2022 dhe nëntori 2023.
Autoritetet gjetën Porsche Cayenne dhe Volkswagen, me përputhje balistike me krime në Gjermani.
Rama lidhet me klane ballkanike në Mal të Zi, Serbi, Kroaci dhe kartelat La Cordillera, Sinaloa, Jalisco.
Operacioni u zhvillua në bashkëpunim me autoritetet e SHBA-së, ku u arrestua edhe alias Cakin.
Florind Rama thotë "Nuk më duhet avokat!" në videon e publikuar të arrestimit në Kolumbi, ku një agjent i Interpol-it i lexon akuzat dhe ai konfirmon komunikim me një familjar.
Sipas autoriteteve spanjolle, viktima kishte shenja torture dhe plagë armësh. Ajo ishte informatore e shërbimeve gjermane me njohuri për rrjetet kriminale në Amerikën Latine.