Policia e Tiranës ka finalizuar operacionin e koduar "Perugia", duke arrestuar provizorisht shtetasin A. S., 35 vjeç, banues në Tiranë. Ky arrestim u bë në rrugën "Dritan Hoxha", me qëllim ekstradimin drejt Italisë.
Shërbimet e Sektorit të Forcës së Posaçme "Shqiponja", në bashkëpunim me Seksionin për Hetimin e Narkotikëve, vepruan bazuar në informacionet e shkëmbyera me Interpol Tiranën për vendndodhjen e këtij shtetasi të shpallur në kërkim ndërkombëtar.
Gjykata Penale e Peruxhias në Itali i ka caktuar masën e sigurisë "Arrest në burg" për veprat penale "Organizata kriminale" dhe "Trafikimi i lëndëve narkotike". Ai dyshohet si pjesëtar i një organizate që trafikon lëndë narkotike.
Interpol Tirana vijon veprimet procedurale në bashkëpunim me Interpol Romën për të siguruar ekstradimin e tij në Itali.