Më datë 04.06.2026, Stacioni Policor në Ferizaj ka arrestuar një person pas raportimeve për shqetësime të shkaktuara në rrugën “Shaqir Hasani”.
Zyrtarët policorë, pas ndërhyrjes në vendngjarje, kontrolluan të dyshuarin dhe gjetën një mjet të mprehtë, përkatësisht një thikë, e cila u sekuestrua në cilësinë e provës materiale. Sipas njoftimit të Drejtorisë Rajonale të Policisë në Ferizaj, personi ishte nën ndikimin e alkoolit, ndërsa testimi me alkooltest konfirmoi nivelin prej 0.79 promila.
I dyshuari është shoqëruar në stacionin policor dhe ndaj tij është iniciuar rasti për veprën penale “Mbajtja në pronësi, kontroll ose posedim të paautorizuar të armës apo mjetit të rrezikshëm”. Me vendim të prokurorit të shtetit, ndaj tij është caktuar masa e ndalimit policor për 48 orë.