Pas veprimeve intensive hetimore, Prokuroria Themelore në Pejë në bashkëpunim me Policinë e Kosovës (Drejtorinë Rajonale të Hetimeve), ka ndaluar një person si të dyshuar për dy vepra penale: “Manipulimi me prova” dhe “Mbajtja në pronësi, kontroll ose posedim të paautorizuar të armëve”.
Ky arrestim është pjesë e procesit hetimor për rastin e humbjes së jetës së një punëtori në një vendpunishte në fshatin Gllaviqicë, ngjarje e regjistruar më 29 prill 2026. I dyshuari, me urdhër të prokurorit të shtetit, është ndaluar për një periudhë prej 48 orësh.
Krahas këtij arrestimi, organi i akuzës bëri të ditur se po zhvillon hetime edhe ndaj një familjari të të pandehurit. Ky i fundit dyshohet për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”. Prokuroria njoftoi se do të ndërmerren të gjitha veprimet e nevojshme procedurale për zbardhjen e plotë të rrethanave të këtij rasti.