Një punëtor 31-vjeçar ka humbur jetën sot rreth orës 13:00 në Vushtrri, pasi ka rënë nga një kat i lartë i një objekti në ndërtim. Sipas njoftimit të policisë, ai është dërguar me autoambulancë në repartin e emergjencës të spitalit të qytetit, por nuk ka arritur t’u mbijetojë lëndimeve.
Në vendin e ngjarjes kanë dalë njësitë policore, inspektorët komunalë dhe inspektorët e punës. Prokurori për krime të rënda ka urdhëruar inicimin e rastit për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.
Hetuesit policorë të Sektorit Rajonal të Hetimeve kanë intervistuar pesë persona në cilësinë e dëshmitarëve. Një person i dyshuar është intervistuar në prani të avokatit mbrojtës dhe pas intervistimit prokurori ka nxjerrë aktvendim për ndalimin e tij për 48 orë.
Me urdhër të prokurorit, trupi i pajetë i viktimës është dërguar në Institutin e Mjekësisë Ligjore për obduksion. Hetimet vazhdojnë për zbardhjen e plotë të rrethanave.