Një punëtor rreth 48-vjeçar humbi jetën në vendin e punës, në zonën industriale të Shtimes. Ngjarja ndodhi më 15 prill 2026, rreth orës 20:45, sipas deklaratës së zëdhënësit të Policisë së Kosovës për rajonin e Ferizajt, Kanun Veseli.
Kanun Veseli deklaroi se policia pranoi informacion për lëndimin e punëtorit gjatë punës në një kompani. Ai u dërgua menjëherë në Emergjencën e Ferizajt, ku ekipi mjekësor konstatuan vdekjen e tij.
Njësitë policore, përfshirë patrullat dhe hetuesit e stacionit, dolën në vendngjarje. Gjithashtu u njoftuan hetuesit dhe krimteknikët nga Sektori Rajonal i Hetimeve, prokurori i shtetit si dhe Inspektorati i Punës, të cilët ndërmorën veprimet hetimore të mëtejme.
Rasti u iniciua si “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”. Sipas të dhënave, numri i punëtorëve që kanë humbur jetën në vendin e punës ka arritur tetë.
Së fundmi, një 59-vjeçar ka mbetur i vdekur në Ferizaj pas rënies nga kati i gjashtë i një objekti në ndërtim. Pas këtij rasti, ministri për Punë, Familje dhe Vlerat e Luftës Çlirimtare, Andin Hoti, ka njoftuar nisjen e një aksioni të jashtëzakonshëm inspektimi në të gjithë Kosovën, veçanërisht në sektorin e ndërtimtarisë.