Specialistët e Seksionit për Hetimin e Narkotikëve në Drejtorinë Vendore të Policisë Fier, në bashkëpunim me Shërbimet e Forcës së Posaçme “Shqiponja”, kanë goditur një rast të shpërndarjes së lëndëve narkotike në fshatin Sheqishte të Patosit.
Si rezultat i hetimeve, u kap në flagrancë dhe u arrestua Sebastian Temples (S. T.), 28 vjeç, shtetas norvegjez, i cili banonte përkohësisht në një ambient të marrë me qira.
Gjatë kontrollit të ushtruar ndaj tij dhe automjetit të marrë me qira që drejtonte, shërbimet e policisë gjetën dhe sekuestruan një sasi lënde të dyshuar narkotike kokainë, e cila dyshohet se do të shpërndahej për përfitim financiar.
Materialet procedurale iu referuan Prokurorisë pranë Gjykatës së Shkallës së Parë Fier për veprime të mëtejshme lidhur me veprën penale “Prodhimi dhe shitja e lëndëve narkotike”.
Hetimet vijojnë për identifikimin e personave të tjerë të mundshëm të përfshirë në këtë veprimtari kriminale, sipas njoftimit të policisë.
Përditësime
Policia e Shtetit konfirmoi se arrestimi i norvegjezit Sebastian Temples ndodhi më 19 prill të dielën në Sheqishte të Patosit.