Shefi i Komisariatit të Policisë në Sarandë, Gëzim Bashllari, u arrestua nga Agjencia e Mbikëqyrjes Policore. Në pranga ranë edhe tre inspektorë të tij: Andi Duro, Ajdin Ismailaj dhe Robert Çullaj.
Të katër zyrtarët akuzohen për shpërdorim detyre, kryerje veprimesh arbitrare dhe mosmarrje masash për ndalimin e ndërtimit pa leje. Hetimi filloi pas një denoncimi për ndërtim të paligjshëm në një hapësirë plazhi në lagjen nr. 1 të Sarandës.
Gjatë operacionit u arrestuan edhe tetë punëtorë që punonin në objekt. Pronarja e pronës, Arjola Dhrami Bajo, është shpallur në kërkim. Prona ishte në emër të Isuf Jaçajt, i cili u vra pas një shpërthimi me tritol në tetor të vitit 2025.
Hetuesit dyshojnë se një grup kriminal me bazë në Kamëz e mori pronën me forcë dhe po ndërtonte një lokal veror. Drejtori i Përgjithshëm i Policisë së Shtetit, Skënder Hita, urdhëroi nisjen e hetimit dhe bashkëpunimin me Prokurorinë e Sarandës.