Ish-oficeri i policisë, Irakli Koçiaj, u vetëdorëzua në komisariatin e qytetit të Sarandës, pasi ishte shpallur në kërkim prej datës 25 maj. Ndaj tij rëndon akuza për “shpërdorim detyre”, në kuadër të hetimeve që po zhvillon Prokuroria e Sarandës lidhur me dyshimet për favorizim të ndërtimeve të paligjshme në zonën e Ksamilit.
Sipas procedurave, Koçiaj pritet të dalë para gjykatës brenda dy ditëve në vijim, ku do të njihet me masën e sigurisë. Ky rast pason një sërë arrestimesh në radhët e policisë vendore, ku deri më tani janë ndaluar 8 ish-efektivë. Mes personave të ndaluar më herët është edhe ish-shefi i komisariatit, Gëzim Bashllari, i cili ndodhet në burg me afat 30-ditor, ndërsa 5 ish-punonjës të tjerë janë lënë në masën “arrest shtëpie”.
Në vijim të aksioneve kundër ndërtimeve pa leje në Sarandë, autoritetet janë ende në kërkim të 4 punonjësve të IMT. Hetimet kanë nisur pas dyshimeve për favorizim të objekteve të ndryshme, ku përfshihen rastet e prishjes së beach-barit “Copacabana” dhe ndërhyrjet në hotelin “Oasis”. Për rastin e fundit, pronari Alqi Papa u arrestua nga autoritetet si pjesë e këtij operacioni.
Përditësime
Hetimet për shpërdorim detyre në Bashkinë Sarandë kanë shënuar zhvillime të reja: katër punonjës të IMT-së, të shpallur më parë në kërkim, janë vetëdorëzuar pranë organeve të drejtësisë. Ndërkohë, Gjykata pritet të shqyrtojë kërkesën për ndryshimin e masës së sigurisë për dy nga tetë ish-zyrtarët e ndaluar, mes të cilëve edhe ish-shefi i Komisariatit të Sarandës, Irakli Koçiaj.