Forcat e Policisë së Shtetit në Mirditë kanë vënë në pranga një shtetas, i cili u kap në flagrancë duke ndezur vatra zjarri në zonën e pyllëzuar të fshatit Gziq. Operacioni për kapjen e tij erdhi pas një vëzhgimi në terren që zgjati prej tri ditësh. Sipas të dhënave zyrtare, i arrestuari dyshohet se ka shkaktuar dëme në një sipërfaqe pyjore prej rreth 400 metrash katrorë, ndërsa ndërhyrja e shpejtë e shërbimeve policore parandaloi përhapjen e flakëve në territor.
Ministri i Punëve të Brendshme, Besfort Lamallari, reagoi menjëherë për ngjarjen përmes një njoftimi publik. Ai e cilësoi zjarrvënien e qëllimshme si një vepër kriminale dhe jo si një fatkeqësi natyrore. Ministri theksoi se i dyshuari mund të jetë autor edhe i disa episodeve të tjera të ngjashme të regjistruara kohët e fundit në territorin e Bashkisë Mirditë.
Në apelin e tij drejtuar organeve të drejtësisë, Lamallari kërkoi një hetim të plotë dhe pa kompromis. “Apeli im për Prokurorinë është i drejtpërdrejtë: kjo çështje duhet të shkojë deri në fund. Hetim i plotë, prova të plota dhe përgjegjësi penale për autorin, nëse fajësia provohet”, deklaroi ministri. Ai shtoi se Policia e Shtetit do të vijojë kontrollet e rrepta për të identifikuar dhe arrestuar çdo autor tjetër të zjarrvënieve të qëllimshme në vend, duke nënvizuar se mosndëshkimi i këtij fenomeni është po aq i rrezikshëm sa edhe vetë akti kriminal.
Përditësime
I dyshuari 65-vjeçar ka pranuar fajësinë për zjarrvënien në momentin e arrestimit. Ministri i Brendshëm, Besfort Lamallari, saktësoi se ndalimi u krye në flagrancë pas një vëzhgimi tre-ditor ndaj personit. Lidhur me ngjarjen ka reaguar edhe Ministri i Mbrojtjes, Ermal Nufi, duke dënuar aktin kriminal.