Sipas raportimeve zyrtare të Komisariatit të Policisë Lezhë, ngjarja ka ndodhur më 3 korrik 2026, kur i dyshuari Bashkim Aliaj ndozi zjarr për të djegur mbeturina në afërsi të subjektit të tij tregtar. Flakët dolën shpejt nga kontrolli dhe u përhapën në masivin pyjor të malit të Shëngjinit.
Gjatë operacionit për shuarjen e zjarrit, u regjistrua një shpërthim i një predhe të pashpërthyer, e cila u aktivizua si pasojë e temperaturave të larta. Nga ky shpërthim mbeti i dëmtuar lehtë një 30-vjeçar, shtetasi A. U., i cili ishte pasagjer në një automjet që po kalonte në atë zonë. Ai ka marrë ndihmën e nevojshme mjekësore dhe ndodhet jashtë rrezikut për jetën.
Hetimet paraprake zbuluan gjithashtu se shtetasi Bashkim Aliaj kishte hequr pajisjen DVR të kamerave të sigurisë nga subjekti i tij tregtar, veprim i cili dyshohet se është kryer për të penguar zbardhjen e ngjarjes.
Ndaj 57-vjeçarit janë ngritur katër akuza penale:
• Shkatërrimi i pronës nga pakujdesia
• Shkatërrimi nga pakujdesia me zjarr i pyjeve dhe mjedisit pyjor
• Veprime që pengojnë zbulimin e së vërtetës
• Plagosje e lehtë nga pakujdesia