Policia e Mirditës ka vënë në pranga shtetasin Luan Vuka alias Artan Vuka, 52 vjeç, banues në fshatin Ndërfushaz të Mirditës, pasi dogji një dyqan me materiale të përdorura në tregun e qytetit dhe tentoi të digjnte një gomisteri.
Ngjarja ndodhi në dyqanin në pronësi të shtetasit Gj. D., ku ra zjarr dhe u djegën materiale të përdorura. Në të njëjtën kohë, u djegën disa goma në gomisterinë e shtetasit A. P., me qëllim djegien e plotë të saj, por policia e ndaloi në kohë.
Pas njoftimit për zjarrin, shërbimet e Komisariatit të Policisë Mirditë organizuan punën për zbardhjen e rrethanave. Nga veprimet e para në vendngjarje lindi dyshimi se bëhej fjalë për zjarrvënie të qëllimshme në të dy rastet.
Në bashkëpunim me Prokurorinë, u finalizua operacioni policor i koduar “Fast”, që çoi në identifikimin, kapjen dhe arrestimin e autorit. Ai akuzohet për veprën penale “shkatërrimi i pronës me zjarr”.
I arrestuari ka precedent kriminal të mëparshëm, ku është dënuar për:
- dhunë në familje;
- goditje për shkak të detyrës ndaj punonjësve të Policisë;
- dëmtim prone;
- mbajtje pa leje të armëve të ftohta;
- thyerje të masës së sigurisë “arrest në shtëpi”.
Materialet procedurale iu referuan Prokurorisë pranë Gjykatës së Shkallës së Parë Lezhë për veprime të mëtejshme. Policia dhe Prokuroria vijojnë punën për dokumentimin e plotë ligjor të ngjarjeve.