Operacioni policor u zhvillua nga Komisariati i Policisë Përmet dhe Seksioni për Hetimin e Krimeve Ekonomike dhe Financiare, në bashkëpunim me Autoritetin Kombëtar të Ushqimit (AKU) Gjirokastër. Gjatë kontrollit në banesën e shtetasit A. L., autoritetet gjetën një ambient të përshtatur si thertore për bagëti të imta, ku kishte kafshë në proces therjeje dhe të tjera të therura më parë.
Hetimet zbuluan praninë e një tubacioni përmes të cilit mbetjet e therjes hidheshin në lumin Vjosë, duke shkaktuar ndotje të mjedisit. Gjatë kontrollit, policia gjeti dhe sekuestroi dhjetëra matrikuj bagëtish, të dyshuar si të falsifikuar. Për këtë shkelje, AKU bllokoi menjëherë ambientin dhe sanksionoi pronarin me masë administrative prej 200 mijë lekësh.
Shtetasi A. L. është arrestuar në flagrancë dhe akuzohet për katër vepra penale:
• Fshehja e të ardhurave
• Prodhimi i kundërligjshëm i artikujve dhe mallrave industriale dhe ushqimore
• Falsifikimi i vulave, stampave ose formularëve
• Ndotja e ujërave
Krahas pronarit, procedim penal ka nisur edhe për dy veterinerë, shtetasit L. D. (54 vjeç) dhe Y. H. (66 vjeç), të cilët dyshohen për shpërdorim detyre. Sipas policisë, ata nuk kanë ushtruar kontrollet dhe detyrimet ligjore për aktivitetin e paligjshëm në pronën e 62-vjeçarit. Materialet hetimore i janë referuar prokurorisë për veprime të mëtejshme.