Policia e Fierit ka finalizuar operacionin e koduar "Skadenca", pas një hetimi disamujor të zhvilluar me metoda speciale të hetimit, në bashkëpunim me Prokurorinë.
Si rezultat, u arrestua në flagrancë shtetasi Bojken Bregovina, 42 vjeç, banues në Fier. Ai dyshohet se prej një periudhe të gjatë kohore magazinonte në banesën e tij medikamente të skaduara dhe pa faturë tatimore, të cilat i shpërndante në farmacitë e qytetit për përfitim financiar.
Bazuar në provat e siguruar, Gjykata e Shkallës së Parë të Juridiksionit të Përgjithshëm Fier ka lejuar kontrollin e banesës. Gjatë këtij kontrolli u gjetën dhe sekuestruan në cilësinë e provës materiale 4289 kuti me medikamente të ndryshme:
- 1635 kuti ilaçe të skaduara;
- 2654 kuti pa faturë tatimore, të dyshuara si të futura kontrabandë.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Fier, në ngarkim të Bojken Bregovinës për veprat penale "Prodhimi dhe tregtimi i barnave dhe pajisjeve mjekësore të falsifikuara ose të rrezikshme për jetën dhe shëndetin", "Fshehja e të ardhurave", "Ruajtja ose depozitimi i mallrave kontrabandë" dhe "Tregtimi dhe transportimi i mallrave që janë kontrabandë".
Hetimi u krye nga specialistët e Seksionit për Hetimin e Krimeve Ekonomike-Financiare. Ngjarja ndodhi më 18 janar 2026.