Policia e Durrësit finalizoi fazën e 13-të të operacionit policor “STORM” kundër shfrytëzimit për prostitucion, pas një hetimi dyjavor me metoda speciale.
Në zonën e Vollgës u arrestua në flagrancë shtetasja L. H., 52 vjeçe, lindur dhe banuese në Armeni. Ajo dyshohet si organizatore për veprat penale “Prostitucioni” dhe “Përshtatja e ambienteve për prostitucion”.
Gjithashtu, u procedua penalisht:
- një 22-vjeçare nga Peruja;
- tre shtetas nga qarku Durrës,
të gjithë për veprën penale “Prostitucioni”.
Hetimet nxorën në pah se shtetasit e huaja kishin marrë me qira dy apartamente: një në zonën e Vollgës, lagjën nr. 1, dhe një tjetër në zonën e Plazhit, lagjën nr. 13, në Durrës. Këto i kishin përshtatur për ushtrimin e prostitucionit.
Burimet policore raportojnë se dyert e banesave u hapën me ndihmën e zjarrfikësve, pasi banorët refuzuan të bashkëpunonin.
Si prova materiale u sekuestruan dy pasaporta të shtetaseve të huaja, shuma parash, karta telefoni dhe bllok shënimesh.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme.