Seksioni për Hetimin e Trafiqve të DVP Durrës, në bashkëpunim me shërbimet operacionale, finalizoi fazën e 19-të të operacionit policor të koduar "Storm", pas një hetimi dyjavor me metoda proaktive.
Si rezultat, u arrestua në flagrancë shtetasja Sh. S., 24 vjeçe, lindur dhe banuese në Brazil. Ajo kishte marrë me qira një ambient në lagjen nr. 4 të Durrësit, të cilin e kishte përshtatur për ushtrimin e aktivitetit të prostitucionit dhe përfitimin e vlerave monetare nga kjo veprimtari.
Gjatë ndërhyrjes policore, shtetasja refuzoi të hapte derën e ambientit, e cila u hap më pas me ndihmën e shërbimit zjarrfikës.
Në vijim të veprimeve procedurale, u proceduan në gjendje të lirë për veprën penale "Prostitucioni" edhe tre shtetas shqiptarë.
Si prova materiale u sekuestruan një pasaportë e shtetases së huaj, shuma parash të dyshuara të përfituara nga prostitucioni dhe dy aparate celularë.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme.