Policia e Durrësit finalizoi operacionin policor të koduar Storm 15, pas një hetimi dyjavor me metoda proaktive dhe speciale, nën drejtimin e Prokurorisë. Operacioni u zhvillua nga Seksioni për Hetimin e Trafiqeve, në bashkëpunim me shërbimet operacionale të Drejtoria Vendore e Policisë Durrës.
Si rezultat, u arrestuan në flagrancë shtetaset N. P., 26 vjeçe, dhe M. B., 39 vjeçe, lindur dhe banuese në Brazil. Ato dyshohen për veprat penale prodhim dhe shitje të lëndëve narkotike, prostitucion dhe përshtatja e ambienteve për prostitucion.
Në vijim të veprimeve procedurale, u procedua në gjendje të lirë për veprën penale prostitucion një shtetas 22-vjeç, banues në Durrës. Gjithashtu, u procedua në gjendje të lirë për veprën penale përshtatja e ambienteve për prostitucion pronari i ambienteve, shtetasi F. T., 30 vjeç, banues në Fushë-Krujë.
Nga hetimet rezultoi se shtetaset e arrestuara kishin marrë me qira dy ambiente në rrugën Dalip Peza, lagjja nr. 17 në Durrës, të cilat i kishin përshtatur për ushtrimin e prostitucionit. Gjatë ndërhyrjes policore, njëra prej tyre refuzoi të hapte derën e ambientit, e cila u hap më pas me ndihmën e shërbimit zjarrfikës.
Në cilësinë e provës materiale u sekuestruan 2 pasaporta të shtetaseve të huaja, shuma parash, 8 aparate celularë, një DVR, karta telefonike, 2 blloqe shënimesh, si dhe 2 sasi të vogla lënde narkotike të dyshuara si kanabis.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.