Policia e Durrësit finalizoi fazën e 14-të të operacionit policor të koduar “Storm”, pas hetimesh dyjavore me metoda proaktive. Operacioni u zhvillua nga Seksioni për Hetimin e Trafiqeve, me mbështetjen e Forcës së Posaçme Operacionale, për veprat penale “Prostitucion” dhe “Përshtatja e ambienteve për prostitucion”.
Hetimet rezultuan me zbulimin e një apartamenti të marrë me qira në zonën e Vollgës, lagjja nr. 1, të cilin e kishin përshtatur për ushtrimin e prostitucionit. Si rezultat, u proceduan në gjendje të lirë shtetaset braziliane Th. C., 35 vjeçe, dhe A. F., 39 vjeçe.
Gjithashtu, për veprën penale “Prostitucioni” u proceduan shtetasit shqiptarë E. D. dhe S. A., banues në Durrës. Disa burime i cilësojnë shqiptarët si klientë.
Në cilësinë e provës materiale u sekuestruan:
- 1 080 euro, 116 700 lekë, 120 dollarë amerikanë, 80 paund britanikë, 150 franga dhe 3 430 dinarë;
- dy pasaporta të shtetaseve të huaja;
- 8 aparate celularë, karta telefoni dhe blloqe shënimesh.
Materialet proceduriale iu kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës për vijim të ndjekjes penale.