Policia e Tiranës ka finalizuar me sukses operacionin e koduar “Last Post”, përmes të cilit u goditën dy raste të dyshuara të ushtrimit të prostitucionit në ambiente të marra me qira në kryeqytet. Ky aktivitet, sipas hetimeve të kryera nga specialistët e Seksionit për Hetimin e Trafiqeve të Paligjshme, promovohej në mënyrë digjitale përmes rrjeteve sociale.
Në kuadër të këtij operacioni u arrestuan tri shtetase të huaja. Sipas njoftimit zyrtar, shtetasja L. S., 46 vjeçe, nga Brazili, akuzohet se shfrytëzonte bashkatdhetaren e saj T. S., 21 vjeçe, për të ushtruar prostitucion në një apartament të marrë me qira në rrugën “Abdyl Frashëri”. Në këtë banesë, shërbimet e policisë gjetën dhe sekuestruan 6 celularë, të cilët dyshohet se përdoreshin për reklamimin e shërbimeve të paligjshme.
Në një rast të dytë të zbuluar gjatë të njëjtit operacion, u arrestua shtetasja kolumbiane M. V., 23 vjeçe. Ajo dyshohet se kishte marrë me qira një banesë në rrugën “Hamdi Sulcebe”, ku ushtronte aktivitetin e prostitucionit.
Autoritetet bënë me dije se materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprime të mëtejshme hetimore. Policia theksoi se kontrollet dhe monitorimi i hapësirës digjitale për identifikimin dhe goditjen e rasteve të ngjashme do të vijojnë edhe në të ardhmen.