Policia e Tiranës arrestoi sot, më 6 maj, dy shtetase të huaja për ushtrim prostitucioni në apartamente të marra me qira në kryeqytet. Bëhet fjalë për P. Th., 33-vjeçare vietnameze, dhe Y. W., 43-vjeçare kineze.
Operacionet e koduara “Network” dhe “Foleja 7” u zhvilluan nga Seksioni për Hetimin e Trafiqeve dhe shërbimet e Komisariatit të Policisë Nr. 3. Gjatë operacionit “Network”, u arrestua P. Th., e cila kishte marrë me qira ditore një apartament në rrugën Mine Peza për këtë qëllim. Në operacionin “Foleja 7”, u arrestua Y. W., e dyshuar se ushtronte prostitucion në një apartament në Rrugen e Durrësit.
Në vijim të hetimeve, një shtetas u procedua penalisht në gjendje të lirë si përfitues nga kjo veprimtari. Gjatë ndërhyrjeve, efektivët sekuestruan shuma parash dhe tre telefona celularë.
Materialet procedurale i kaluan Prokurorisë së Tiranës për veprime të mëtejshme. Aksionet synojnë evidentimin dhe goditjen e rasteve të qiramarrjes së apartamenteve për ushtrim prostitucioni në zona të ndryshme të Tiranës.