Policia e Tiranës ka goditur tri raste të ushtrimit të prostitucionit në kryeqytet, duke finalizuar fazën e dytë të operacionit policor të koduar "Last post". Si rezultat i hetimeve të shtrira në terren dhe në hapësirën digjitale, katër persona janë vënë në pranga, ndërsa një tjetër po ndiqet në gjendje të lirë.
Sipas njoftimit zyrtar, personat e arrestuar janë:
• I. L., 25 vjeçe, shtetase braziliane;
• U. L., 42 vjeçe, shtetase vietnameze;
• Th. H., 37 vjeçe, shtetase vietnameze;
• E. H., 35 vjeç, shtetas shqiptar.
Sipas hetimeve, shtetaset e huaja kishin përshtatur apartamente të marra me qira ditore në rrugët "Xhoxhi Martini", "Milan Shuflaj" dhe "Him Kolli" për ushtrimin e kësaj veprimtarie. Shtetasi shqiptar E. H., i identifikuar nga disa media si Ervin Hysolli, akuzohet se shfrytëzonte për prostitucion 37-vjeçaren vietnameze.
Autoritetet policore kanë sekuestruar katër telefona celularë, të cilët dyshohet se përdoreshin për reklamimin e shërbimeve në rrjetet sociale. Materialet procedurale i janë përcjellë Prokurorisë për veprime të mëtejshme. Ndërkohë, një person tjetër, i cili dyshohet si përfitues nga kjo veprimtari e kundërligjshme, është proceduar në gjendje të lirë.