Policia e Tiranës arrestoi dy shtetas për shfrytëzimin e një shtetaseje nga Azerbajxhani për prostitucion. Ngjarja ndodhi në një apartament me qira në rrugën “Mihal Guri” në kryeqytet.
Specialistët e Seksionit për Hetimin e Trafiqeve të Paligjshme në Drejtorinë Vendore të Policisë Tiranë finalizuan operacionin policor të koduar “Network 3”, pas një hetimi me metoda proaktive nën drejtimin e Prokurorisë. Të arrestuarit janë R. F., 20 vjeç, dhe A. S., 39 vjeç, banues në Tiranë. Ata bashkëpunuan me njëri-tjetrin për të shfrytëzuar shtetasen e huaj, e cila ushtronte prostitucionin në atë apartament.
Policia nisi procedimin penal ndaj shtetases nga Azerbajxhani për ushtrimin e prostitucionit. Si provë materiale u sekuestruan një shumë parash të dyshuara si të përfituara nga kjo veprimtari dhe 4 celularë.
Materialet procedurale iu referuan Prokurorisë së Tiranës për veprime të mëtejshme.