Policia e Durrësit ka finalizuar operacionin policor të koduar Storm 18 në lagjen nr. 1 të qytetit, duke goditur një aktivitet të paligjshëm prostitucioni.
Specialistët e Seksionit për Hetimin e Trafiqeve, së bashku me Forcën e Posaçme Operacionale, kryen hetime për një muaj me metoda speciale.
Në flagrancë u arrestua shtetasja kolumbiane M. L., 26 vjeçe, e cila kishte marrë me qira një apartament, e kishte përshtatur për ushtrim prostitucioni dhe merrte pjesë vetë në të.
Gjithashtu, u arrestuan për ushtrim prostitucioni shtetaset kolumbiane A. G., 33 vjeçe, dhe B. A., 26 vjeçe.
Në vijim të hetimeve, u proceduan penalisht në gjendje të lirë tre persona të tjerë për veprën penale të prostitucionit.
Si prova materiale u sekuestruan:
• 3 pasaporta të shtetaseve të arrestuara;
• një shumë parash e dyshuar si e përfituar nga prostitucioni;
• një leje drejtimi;
• 3 aparate celularë.
Materialet procedurale iu kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës.