Operacioni policor, i koduar “Rent home 10”, u finalizua pas disa ditësh hetime nga specialistët e Sektorit për Hetimin e Narkotikëve. Objektivi i ndërhyrjes ishte një apartament i marrë me qira në lagjen “Ahmet Haxhia”, i cili dyshohet se ishte përshtatur për aktivitete të paligjshme.
Në pranga kanë rënë shtetasja me iniciale L. S., 29 vjeçe, dhe shtetasi N. H., 40 vjeç. Sipas njoftimit të policisë, 29-vjeçarja braziliane kishte vënë ambientin në dispozicion të ushtrimit të prostitucionit dhe shitjes së lëndëve narkotike. Ndërkohë, 40-vjeçari, i cili u kap gjatë ndërhyrjes në të njëjtin mjedis, dyshohet se ka qenë përfitues nga këto veprimtari kriminale.
Gjatë kontrollit, efektivët sekuestruan sasi të lëndëve narkotike kokainë dhe Cannabis Sativa, si dhe një shumë parash në euro dhe lekë. Materialet procedurale janë referuar në Prokurori për kryerjen e veprimeve të mëtejshme hetimore. Në përputhje me legjislacionin në fuqi, personat e arrestuar prezumohen të pafajshëm deri në një vendim gjyqësor të formës së prerë.