Specialistët e Seksionit për Hetimin e Krimeve Ekonomiko-Financiare në Drejtorinë Vendore të Policisë Durrës finalizuan me sukses operacionin e koduar “Illegality”, pas informacioneve të siguruara përmes inteligjencës informative. Operacioni kishte për qëllim parandalimin dhe goditjen e veprimtarisë kriminale në fushën e kontrabandës së mallrave.
Gjatë kontrollit të ushtruar në një dyqan në lagjen nr. 14 të qytetit të Durrësit, në pronësi të shtetasit R. D., policia zbuloi mallra të ndryshme që dyshohet se janë futur në vendin tonë në shkelje të procedurave doganore. Në ambientet e biznesit u sekuestruan qindra paketa me cigare të llojeve të ndryshme, si dhe sasi fishekzjarrësh. Përveç mallrave të kontrabanduara, verifikimet e policisë treguan se pronari kishte shmangur detyrimet fiskale dhe fshihte të ardhurat e përfituara nga shitja e paligjshme e këtyre produkteve.
Shtetasi R. D., 46 vjeç, banues në Tiranë, u arrestua në flagrancë. Ndaj tij rëndojnë akuzat për kryerjen e veprave penale:
- Kontrabanda me mallra me të cilat paguhet akcizë ose me pezullim të plotë apo të pjesshëm nga detyrimet doganore ose të akcizës
- Tregtimi dhe transportimi i mallrave kontrabandë
- Ruajtja ose depozitimi i mallrave kontrabandë
- Fshehja e të ardhurave
- Mospagimi i taksave dhe tatimeve
Materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme ligjore.