Autoritetet policore në Portin e Durrësit, në bashkëpunim me Prokurorinë e Durrësit dhe autoritetet doganore, zhvilluan operacionin policor të koduar "Trageti", duke goditur dy raste të tentativës për kontrabandë të mallrave që paguajnë akcizë.
Në rastin e parë, shërbimet e Drejtorisë Vendore për Kufirin dhe Migracionin Durrës ndaluan për kontroll në vijën e dytë një automjet të drejtuar nga shtetasi E. B., 34 vjeç, banues në Durrës. Gjatë kontrollit, në automjet u gjetën 548 steka cigare pa dokumentacion shoqërues dhe pa pullë fiskale. Pas kësaj, policia ushtroi kontroll në banesën e shtetasit E. B., ku gjeti dhe sekuestroi një armë zjarri automatike AK-47.
Në rastin e dytë, në kuadër të të njëjtit operacion, kontrolli u shtri edhe në brendësi të një trageti. Në ambientet e hotelerisë së tij, u zbuluan dhe u sekuestruan 250 steka cigare të tjera, të fshehura me qëllim futjen kontrabandë në vend. Për këtë rast, u procedua penalisht përgjegjësi i hotelerisë, shtetasi E. S., 34 vjeç, banues në Durrës.
Sipas njoftimit zyrtar, në cilësinë e provës materiale janë sekuestruar gjithsej:
• 798 steka cigare;
• Një armë zjarri automatike;
• Një automjet;
• Dy aparate celularë.
Ndaj shtetasit E. B. rëndojnë akuzat për veprat penale "Kontrabanda me mallra që paguhet akcizë" dhe "Mbajtja pa leje dhe prodhimi i armëve, armëve shpërthyese dhe i municionit". Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës për hetime të mëtejshme.