Shtetasi Sami Alliu, 70 vjeç, është arrestuar nga Policia e Shtetit si i dyshuar për ndezjen e dy zjarreve në periferi të Tiranës. Sipas njoftimeve zyrtare, zjarret janë regjistruar në fshatin Shkozë më datë 8 gusht, pranë një kabine elektrike, dhe në fshatin Lundër më datë 9 gusht, në afërsi të magazinave të Bashkisë së Tiranës. Flakët kanë shkaktuar dëme në sipërfaqe të konsiderueshme toke përreth zonave ku u shkaktuan vatrat.
Pas ndërhyrjes së shërbimeve të Komisariatit të Policisë Nr. 1, autori u identifikua dhe u ndalua brenda një harku kohor prej 48 orësh. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë për hetime të mëtejshme. Sipas burimeve, gjatë marrjes në pyetje, 70-vjeçari dyshohet të ketë deklaruar: "Ku shikoj shkurre, dua t’i djeg".
Policia e Shtetit ka përsëritur apelin për ndalimin e çdo lloj zjarrvënieje, duke theksuar se shkelësit do të përballen me pasojat ligjore. Gjithashtu, autoritetet kanë ftuar qytetarët që të denoncojnë raste të tilla në numrin e emergjencave 112, duke garantuar anonimat.