Mbrëmjen e së enjtes, më 2 prill, në emisionin Opinion të Tv Klan, gazetari investigativ Artan Hoxha deklaroi se grupet iraniane të trafikut të drogës kanë krijuar lidhje të forta me grupe kriminale shqiptare, përfshirë ato të Shijakut dhe Tiranës.
Sipas Hoxhës, njësia Kuds e Gardës Revolucionare Iraniane ka operuar në Shqipëri duke shfrytëzuar lidhjet kulturore dhe kriminale për të krijuar terren në favor të saj. "Në Shqipëri kanë ndodhur akte konkrete, të cilat shërbimet e spiunazhit dhe shërbimet e Gardës Revolucionare janë përpjekur që të krijojnë situata në favor të tyre", tha ai.
Hoxha përmendi një anëtar të kësaj njësie, të kapur në Shqipëri në 2011, figurë kyçe që lidhte trafikun e heroinës me aktivitetet kriminale shqiptare dhe interesat e shërbimeve sekrete iraniane. Celula drejtohej nga një pjesëtar i njësisë Kuds, me lidhje të forta me grupet e Shijakut dhe Tiranës. Pas zbulimit, personi u largua.
Ai theksoi se Irani është një nga degët kryesore të trafikut të heroinës dhe se duke shfrytëzuar këtë rrjet, grupet iraniane u futën në Shqipëri.
Hoxha vlerësoi paralajmërimin e Ambasadës Amerikane për sulme të mundshme në Shqipëri nga Irani si jo thjesht rutinë. Gazetari shtoi se Shqipëria ka vënë në alarm strukturat antiterror, duke përfshirë Policinë dhe Shërbimin Informativ Shtetëror, për të analizuar situatën.