Ish-prokurori Eugen Beci komentoi në emisionin „Kjo Javë“ të News24 paralajmërimin e fundit të Shteteve të Bashkuara për rreziqe të mundshme në Shqipëri nga grupe të lidhura me Iranin.
Ai u shpreh se nuk ka vend për panik, por theksoi nevojën për vigjilencë të shtuar nga autoritetet. «Vend për panik nuk ka. Edhe kur ka pasur informacione konkrete në Republikën e Shqipërisë në 2017-2018 për sulme të mundshme nga Gardën Revolucionare dhe vetë shteti i Iranit, me sukses janë arritur të parandalohen», tha Beci.
Sipas tij, Shqipëria është në radar të sulmeve hibride nga Irani. «Në Shqipëri janë parandaluar tre atentate të mundshme terroriste, të përgatitura dhe të provuara me prova ligjore nga forca të Gardës Revolucionare dhe Forcave Kuds. Kjo tregon se Shqipëria mund të jetë një target në luftën hibride», deklaroi ai.
Beci përmendi tentativat e qelizave të lidhura me Gardën Revolucionare, sulmet kibernetike nga Irani, si dhe ndërprerjen e marrëdhënieve diplomatike. Ai sqaroi se rreziku aktual nuk është ushtarak klasik, por për sulme kibernetike. «Nga hetimet që kemi patur, kemi arritur të identifikojmë një grup personash që paguheshin nga shteti i Iranit për të dezinformuar opinionin publik shqiptar», shtoi ish-prokurori.