Në seancën e zhvilluar në Gjykatën e Posaçme Kundër Korrupsionit dhe Krimit të Organizuar (GJKKO), dëshmitari i drejtësisë Artan Tafani ka zbardhur prapaskenat e planit për ekzekutimin e Rexhep Ginës. Procesi gjyqësor po zhvillohet në mungesë të të pandehurit Laert Haxhiu.
Sipas dëshmisë së Tafanit, organizimi i këtij plani kriminal ka nisur në vitin 2021 në Athinë. Motivimi i dyshuar lidhet me hasmëri të vjetra, pasi Rexhep Gina pretendohet se ka qenë pjesë e grupit të Aldo Bares dhe ka pasur konflikte pronësie me xhaxhain e Laert Haxhiut.
Tafani deklaroi se grupi kishte planifikuar shfrytëzimin e një punonjësi të policisë greke, i cili njihej nga Marjo Diamanti, për të lokalizuar Rexhep Ginën. Në bisedat e zhvilluara në atë kohë, përveç Tafanit dhe Haxhiut, kanë qenë të pranishëm edhe Marjo Diamanti (i vrarë më pas në Greqi) dhe Xhino Bajrami.
Veprimet konkrete
Dëshmitari tregoi se vëzhgimi i Rexhep Ginës kryhej nga njerëz të besuar të Laert Haxhiut, të cilët përcillnin foto dhe video të shënjestrës pranë lokalit të tij. Më tej, Tafani pranoi se në korrik të vitit 2022 kishte kryer veprime konkrete së bashku me Fatjon Veliun për realizimin e vrasjes.
Ai deklaroi se kishin përdorur veshje kamuflazhi, paruke dhe maska silikoni, por vendosi të mos e çonte deri në fund planin për shkak të një konflikti të mëparshëm me Laert Haxhiun.