Artion Duka, drejtor i Drejtorisë Vendore të Policisë Dibër, ka dhënë dorëheqjen nga detyra për arsye familjare.
Me urdhër të Drejtorit të Përgjithshëm të Policisë së Shtetit, Ilir Proda, në këtë detyrë është emëruar përkohësisht Armir Gjikolaj, i cili do ta ushtrojë funksionin deri në vendim të mëtejshëm.
Artion Duka u emërua në krye të Policisë së Dibrës në nëntor 2024. Më parë, ai ka mbajtur postin e Drejtorit të Forcave Operacionale.
Gjatë kësaj periudhe, Duka u përfshi në çështjen e pajisjes IMSI Catcher. Në vitin 2016, ai dhe specialisti Ention Xhelilaj u akuzuan për shpërdorim detyre, për mosadministrim të pajisjes dhe mosgarantim të përdorimit vetëm për trajnim. Atëherë iu vu masa e arrestit shtëpiak, por më pas gjykata vendosi rikthimin e tyre në detyrë.