Agjencia Shtetërore e Kadastrës bën me dije se zonat kadastrale ku po zhvillohet Regjistrimi Fillestar dhe ka nisur Afishimi Publik tani mund të konsultohen edhe online në faqen zyrtare të institucionit.
Përmes një harte interaktive, qytetarët mund të shohin të dhënat e pasurive të evidentuara gjatë matjeve dhe verifikimeve në terren. Sistemi lejon kërkimin sipas zonës kadastrale ose emrit të pronarit apo subjektit, duke shfaqur të gjitha informacionet e mbledhura.
Ndërkohë, dokumentacioni vazhdon të afishohet fizikisht për një periudhë 45-ditore në ambientet e njësive të vetëqeverisjes vendore përkatëse, në përputhje me kuadrin ligjor.
Çdo qytetar që konstaton pasaktësi ose ka pretendime për pronën e tij duhet të paraqesë kërkesë me shkrim pranë pikave të afishimit publik ose drejtorisë vendore të ASHK-së, brenda afatit ligjor.
Afishimi Publik është fazë kyçe e Regjistrimit Fillestar, procesi që regjistron për herë të parë të gjitha pronat në një zonë të caktuar dhe krijon regjistrin zyrtar kadastral. Pas mbylljes së kësaj faze, regjistri konsiderohet i përfunduar për zonën përkatëse.