Agjencia e Statistikave të Kosovës (ASK) ka publikuar raportin tematik “Të dhënat e Tregut të Punës sipas Komunave”, i bazuar në rezultatet e Regjistrimit të Popullsisë, Ekonomive Familjare dhe Banesave (ReKos 2024).
Sipas këtij raporti, shkalla e papunësisë në Kosovë është 13.9%. Nga 1.063.687 persona në moshë pune (15-64 vjeç), 514.791 janë aktivë ekonomikisht, ndërsa 548.896 konsiderohen joaktivë. Numri i të punësuarve është 443.364, kurse i të papunësuarve 71.427. Papunësia te të rinjtë (15-24 vjeç) arrin 19.3%.
Shkalla e joaktivitetit mbetet 51.6%, më e lartë te femrat (65.4%) krahasuar me meshkujt (37.8%).
Sektorët kryesorë të punësimit përfshijnë:
- Tregtia: 19.7%
- Prodhimi: 12.7%
- Ndërtimtaria: 9.6%
- Arsimi: 8.5%
- Administrata publike dhe mbrojtja: 8.2%
Femrat përqendrohen kryesisht në tregti, arsim dhe shëndetësi, ndërsa meshkujt dominojnë në tregti, prodhim, ndërtimtari dhe administratë publike.
Raporti ofron të dhëna të detajuara në nivel komunal, sipas gjinisë, moshës, nivelit të arsimit, përkatësisë etnike dhe profesioneve. ASK thekson se ky raport shërben si burim plotësues, ndërsa Anketa e Fuqisë Punëtore mbetet burimi kryesor për statistikat e tregut të punës, për shkak të metodologjive të ndryshme të mbledhjes së të dhënave.
Përditësime
ASK raporton se 48,9% e femrave të punësuara në Kosovë janë në tregti, arsim dhe kujdesin shëndetësor, sipas ReKos 2024.