Një raportim nga media holandeze De Telegraaf ka nxjerrë në pah se tre shtete anëtare të NATO-s, përfshirë Shqipërinë, Slloveninë dhe Çekinë, nuk kanë përmbushur objektivin e dakordësuar për shpenzimet e mbrojtjes. Ndonëse në mars të vitit 2025 u njoftua se të gjitha vendet kishin arritur pragun minimal prej 2% të PBB-së, një auditim financiar i detajuar nga aleanca zbuloi parregullsi në raportim.
Sipas burimeve të NATO-s, këto vende kishin përfshirë në llogaritjet e tyre zëra që nuk lejohen të klasifikohen si shpenzime mbrojtjeje. Për Shqipërinë dhe Slloveninë, rezultatet treguan një shmangie prej rreth 0.5 pikë përqindjeje nën nivelin e kërkuar. Analistët theksojnë shqetësimin se këto shtete rrezikojnë të mos e arrijnë pragun prej 2% as për vitin në vijim, ndërsa ka rezerva të ngjashme edhe për Hungarinë.
Këto zhvillime kanë nxitur reagime të ashpra nga Shtetet e Bashkuara. Sekretari amerikan i Mbrojtjes, Pete Hegseth, ka paralajmëruar masa ndaj aleatëve që nuk përmbushin detyrimet. Aktualisht, SHBA kontribuon me 15% të buxhetit të NATO-s për misionet, selitë dhe stërvitjet, kontribut i cili mund të rishikohet nëse vendet anëtare nuk ndryshojnë qasje. Burime të mirëinformuara bëjnë me dije se për shkak të këtyre gjetjeve, Shqipëria rrezikon të mos lejohet më për të organizuar samitin e ardhshëm të aleancës.