Auditorja e Përgjithshme, Vlora Spanca, dje dorëzoi në Kuvendin e Republikës së Kosovës Raportin Vjetor të Performancës (RVP) të Zyrës Kombëtare të Auditimit (ZKA) për vitin 2025. Raporti paraqet informacion për performancën e përgjithshme të ZKA-së karshi detyrimeve dhe mandatit ligjor, si dhe reflekton progresin e arritur dhe adresimin e sfidave gjatë vitit.
Në fjalën e saj, Spanca theksoi se ZKA-ja ushtroi mandatin me pavarësi të plotë, integritet profesional të lartë dhe përgjegjësi institucionale. Përmes vlerësimeve të pavarura, objektive dhe të ndershme, ZKA-ja kontribuoi në informimin e publikut dhe të palëve të interesuara, duke forcuar transparencën dhe duke nxitur një kulturë më të avancuar të llogaridhënies në sektorin publik.
Ky angazhim reflektohet në realizimin e plotë të Planit Vjetor të Auditimit për sezonin 2024/2025, ku u përfunduan 133 auditime:
- 104 financiare/të pajtueshmërisë;
- 14 të performancës;
- 12 të pajtueshmërisë;
- 3 me nivel të informacionit të klasifikuar.
Spanca vlerësoi se ky rezultat dëshmon kapacitete profesionale të larta dhe pjekuri institucionale, me shtrirje në organizata me kompleksitet të lartë dhe monitorim të zbatimit të rekomandimeve.
Megjithatë, gjetjet e auditimeve evidentojnë dobësi strukturore në menaxhimin financiar dhe sistemet e kontrollit të brendshëm. Edhe pse ka përmirësime në disa fusha, niveli i zbatimit të rekomandimeve mbetet nën pritshmëri. Spanca nënvizoi nevojën për mekanizma më të fortë dhe efektivë të përgjegjësisë institucionale. Mungesa e funksionimit të Kuvendit gjatë vitit 2025 ka ndikuar në ritmin e shqyrtimit parlamentar të raporteve.